Caspar Barth (1612)
Book 3 - Fable 25. Calvaria.
IN triviis quondam Calvaria glabra iacebat
Relliquiae humani capitis, cui fata supremum
Invidere decus. Puer hanc petulante lapillo
Insultans petit, et convicia plurima iactat.
At lapis impulsu teretis reiectus ab ossis
Insiluit faciem fugientis, et aspera rupit
Vulnere letali confinia frontis et auris.
Proiectos calcare cave. Sacer ille Deorum est
Qui patitur, tutelam habet hic in vindice poena.
Caspar von Barth (1587-1658). Fabularum Aesopiarum Libri III, published in 1612. Available online at the University of Mannheim. |
