<< Home Page | Caxton Index

Aesop's Fables: Caxton (1484)

2.8. Of the hares and of the frogges
(Perry 138)

Men say comynly that after that the tyme goth / so must folke go / For yf thow makest distinction of the tyme thow shalt wel accord the scryptures / wherof Esope reherceth to vs suche a fable / And sayth thus / that he whiche beholdeth the euylle of other / must haue pacyence of the euylle that maye come vpon hym / For somtyme as a hunter chaced thurgh the feldes and woodes / the hares beganne to flee for fere And as they ranne / they adressyd them in to a medowe fulle of frogges / And whanne the frogges herd the hares renne they beganne also to flee and to renne fast / And thenne a hare whiche perceyued them so ferdfull sayd to alle his felawes / Lete vs no more be dredeful ne doubtuous / for we be not alone that haue had drede / For alle the frogges ben in doubte / and haue fere and drede as we haue / Therfore we ought not to despayre / but haue trust and hope to lyue / And yf somme aduersyte cometh vpon vs / we must bere it pacyently / For ones the tyme shalle come that we shalle be oute of payne and oute of all drede /
Therfore in the vnhappy and Infortunat tyme men ought not be despayred / but oughte euer to be in good hope to haue ones better in tyme of prosperyte / For after grete werre cometh good pees / And after the rayne cometh the fair weder

Caxton published his edition of Aesop's fables in 1484. There are modern reprints by Joseph Jacobs (D. Nutt: London, 1889) and more recently by Robert Lenaghan (Harvard University Press: Cambridge, 1967). Lenaghan's edition is available at amazon.com.