<< Home Page | Phryx Aesopus (Osius) Index

Phryx Aesopus (Osius, 1574)

123. ICTIS ET VULPES. (Perry 605)

QUadrupedem, silvis quae gaudeat, Ictida dicunt,
Mustelam specie pene referre putant.
Illius obduci galeae olim pelle solebant,
Hoc usu veterum tempore grata fuit.
Forte patentis ubi cum Vulpe per aequora campi
Ex genere hoc quaedam bestia legit iter:
Calleat eximie res quas quaerente vel artes
Vulpe, rudem se nil pene tenere refert.
Saltandi se scire tamen mediocriter artem,
Insuper excellens quo foret, esse nihil.
Mille mihi vafro sunt artes pectore Vulpes,
Utar ut his ego, res si qua requirit, ait.
Sum varie victum quibus ipsa perita parandi,
Et propulsandi quae nocitura liquet.
Visa beata bonis his ergo iudice Vulpes
Ictide, quae verbis hanc venerata fuit.
Se negat econtra [Reg: contra] dignam vitalibus auris,
Fassque vel pretii nullius esse fuit.
Haec mutant dum dicta canum latratibus auras
Auribus attonitae forte sonare notant.
Quae venatorem quia signa venire probabant,
Ictis, ut hinc ergo fac fugiamus, ait.
At celerare fugam nondum male provida Vulpes
Esse necesse metum voce levante refert.
Mox latratus ubi iam clarior occupat aures,
Nulla fugae, Vulpes, nunc mora, dixit, erit.
Ictis ibi: dempsere mihi tua verba timoren,
Maturare fugam nil opus esse puto.
At sectante canes cum venatore viderent,
Nunc fuga nos celeres auferat, Ictis ait.
Utentem saltu quam protinus excipit arbor,
Praeda canum Vulpes facta repente perit.
Quam comes ex illis unam nunc promat ut artem,
Quas multas numero dixerat esse, iubet.
Sic derisa simul perhibetur ab Ictide Vulpes,
Et rabido morsu dilacerata canum.
Qui iactant, quas non didicere, protervius artes,
Confundi levitas ista pudenda facit.
Turpe, rudi quamvis sis pectore, velle videri,
Quodque parum nosti, velle docere pudor.

*** The drawing does not fit the fable. ***
The same drawing also appears at Fable 45 and Fable 166, but does not fit. It looks like an illustration of Perry 226, the fox as judge of the race between the tortoise and the hare.


Phryx Aesopus Habitu Poetico, by Hieronymus Osius, 1574 (artist not identified). Available online at the University of Mannheim. This book clearly recycles a set of images from another book of Aesop's fables. In some cases, the illustration does not match the fable shown, and in some cases I have not been able to identify what fable a given illustration is supposed to illustrate.