<< Home Page | Phryx Aesopus (Osius) Index

Phryx Aesopus (Osius, 1574)

47. ADOLESCENTES ET COCUS. (Perry 66)

EXercere duo pueri qui furta solebant,
Assedere suas res agitante Coco:
Surripit illorum partem de carnibus alter,
Quam socio reddens celet ut ille facit.
Carnis abesse videns commoto pectore partem
Praeter eos nullum qui scit adesse, Cocus:
Coepit ab his furtim sublatam poscere carnem,
Addens ore, velint ni dare sponte, minas.
Tunc rapuisse, suo socio qui dante recepit,
At sese infitians alter habere negat.
Quos veteratores cognoscens, fallitis inquit
Nunc equidem tali me ratione Cocus.
Qui quibus ignoro defuncti fraudibus estis,
Res erit haud vobis fallere tuta Deum.
Insidiae, fraudesque tuis sermonibus absint,
Ingenuae si quis semina mentis habes.
Nam quamquam lateant hominum periuria mentes,
Impunita manent non tamen illa Deo.