Aesop's Fables: Romulus Anglicus
20. de columbis quae sibi falconem in regem fecerunt (p. 579 in
Hervieux; Perry 486).
Columbe, variis adversancium insidiis fatigate, regem habere decreverunt.
Elegerunt ergo Falconem, sperantes quod subiectis sibi parcere vellet
eis et debellare superbos hostes earum. Sed Falco, dum sceptra tenet,
solita feritate persequitur illas, pellendo, rapiendo, et dissipando agmen
earum trepidum. Hinc ergo desolate Columbe ad invicem dixerunt : Gravia
facit Dominus iste corda nostra, dum solite nescit tyrannidis oblivisci.
Tunc ait una de senioribus : Merito hec patimur, quia minus prudenter
eum regem fecimus. Utilior etenim nobis esset ipse remocior socius quam
hostis vicinior. Modo namque potenter invadit nos et manifeste, quod prius
latenter attemptavit et furtive.
Moralitas. Qui se tutandum perverso commiserit, perdet auxilium quod quesivit.
The
Latin text shown here is taken from Léopold Hervieux, Les
fabulistes latins depuis le siècle d'Auguste jusqu'à la.
fin du Moyen-Age (1893-1899). Volume 2.: Phèdre
et ses anciens imitateurs directs et indirects, pp. 564-652. |