Aesop's Fables: Romulus Anglicus
47. de villano et nano (p. 597 in Hervieux; Perry).
Quidam Villanus cepit forte Nanum monticulum. Qui, ut dimitteretur, trium
opcionum potestatem homini dedit. Mulier, ut optaret, virum suum rogavit,
affirmans se mulius scire quid foret optandum. Vir ergo Mulieri duas opciones
concessit. Illa autem, oportunum tempus exspectans, optare tardavit. Contigit
itaque una die ipsam rodere spinam dorsi arietini. Cuius medullam satis
desideratam cum attingere non posset, os Viro porrexit et ait : Utinam
haberes modo ferreum rostrum ad medullam hanc leviter extrahendam! Statim
post verba sedit Maritus ferro rostratus. Tunc ait Uxori : Utinam esset
modo facies mea sine rostro, velud ante fuit! Taliter optatis eorum nichil
utilitatis affuit.
Moralitas. Opus est omni homini, qui alterius se subdit voluntati et regimini,
ut ille qui debet eum regere ac ducere, doctus sit et discretus in utroque.
The
Latin text shown here is taken from Léopold Hervieux, Les
fabulistes latins depuis le siècle d'Auguste jusqu'à la.
fin du Moyen-Age (1893-1899). Volume 2.: Phèdre
et ses anciens imitateurs directs et indirects, pp. 564-652. |