Aesop's Fables: Romulus Anglicus
87. de cicada et formica (p. 624 in Hervieux; Perry
373).
Cycada, hyemis tempore in egestate posita, ad domum venit Formice, rogans
et petens ut aliquid boni sibi faceret, dixitque se domi nichil habere
unde viveret. Cui Formica ait : Quid ergo in estate operata es et messis
tempore, quando ego et familia mea in magno sumus labore, currentes et
congragantes in horreis nostris unde in hyeme vivamus? Cicada respondit
: Ego tunc illis qui laborabant cecini, et nichil mercedis ab eis recepi.
Tunc ait Formica : Melius laborasses in estate, futura (sic pro future)
provida tempestatis, quam quod hyemis inclemencia modo cogit te ad nostra
mendicare ostia. Si igitur ego modo indigerem, quid michi porrigere posses
mendicanti?
Moralitas. Hoc exemplo monemur segniciem fugere et laboribus insistere,
ut necessitatibus nostris succurramus, quia, si opus habuerimus alienis
bonis, multa rogare possumus, sed pauca impetrare.
The
Latin text shown here is taken from Léopold Hervieux, Les
fabulistes latins depuis le siècle d'Auguste jusqu'à la.
fin du Moyen-Age (1893-1899). Volume 2.: Phèdre
et ses anciens imitateurs directs et indirects, pp. 564-652. |