Aesop's Fables: Walter of England
Fable 26. De agno et lupo.
Perry 506
Cum grege barbato dum ludit iunior agnus,
Tendit in hunc menti dissona verba lupus:
"Cur olidam munda sequeris plus matre capellam?
Lac tibi preberet dulcius ipsa parens;
Est prope, festina, matrem pete, munera matris
Lac bibe: nam servat ubera plena tibi."
Agnus ad hec: "Pia capra mihi lac dulce propinat,
Me vice matris alit, me vice matris amat.
Non mihi, sed domino prodest me vivere: vivo
Ut metat in tergo vellera multa meo.
Ergo mihi prestat nutriri lacte caprino
Quam, lac matris habens, mergar in ore tuo."
Omnes vincit opes securam ducere vitam.
Pauperius nihil est quam miser usus opum.
Nil melius sano monitu, nil peius iniquo:
Consilium sequitur certa ruina malum.
Text
as published in Boldrini, Sandro. Uomini e bestie: le favole
dell Aesopus latinus. Lecce: Argo, 1994. |