Aesop's Fables: Walter of England
Fable 28. De leporibus et ranis.
Perry 138
Silva sonat, fugiunt lepores; palus obviat, herent.
Fit mora: respiciunt ante retroque, timent.
Dum librant in mente metus, se mergere pacti,
Se metui et ranas stagna subire vident.
Unus ait: "Sperare licet; non sola timoris
Turba sumus: vano rana timore latet.
Spem decet amplecti, spes est via prima salutis.
Sepe facit metui non metuenda metus.
Corporis est levitas et mentis inertia nobis:
Ista fuge causam suggerit, illa fugam."
Sic timeat quicumque timet ne mole timoris
Spe careat: gravis est spe fugiente timor.
Speret qui metuit: morituros vivere vidi
Spe duce, victuros spe moriente mori.
Text
as published in Boldrini, Sandro. Uomini e bestie: le favole
dell Aesopus latinus. Lecce: Argo, 1994. |