Aesop's Fables: Walter of England
Fable 62. De pastore et lupo.
Perry
Cum pastore lupus sociabile fedus inivit;
Interius totus dissociatur ei.
Ergo, dolum sub melle tegens, lupus inquit: "Amice,
Sum pavidus crebra garrulitate canis.
Ille suo nostrum latratu scindet amorem,
Ille bonum pacis dissociare cupit.
Si me securum, si me vis reddere tutum,
Obses tutele sit datus ille mihi."
Exhibito vigili, lupus intrat tutus ovile,
Dilanians miseras opilionis oves.
Pacis amatorem simulat se perfidus hostis,
Cautius ut vulnus exitiale ferat.
Cuius semper eges rem nulli tradere debes;
Blanditie plus quam dira venena nocent.
Text
as published in Boldrini, Sandro. Uomini e bestie: le favole
dell Aesopus latinus. Lecce: Argo, 1994. |