Caspar Barth (1612)
Book 3 - Fable 24. Gallus et Vulpes.
GAllus canisque olim itiner institerant simul
Communem amicum visitatum, carpere.
Cum nox tenebris fulgidum indueret diem,
In arbore alta monstrat hospitium Canis.
Radice velle se sub hac quiescere,
Gallus cubile peteret in cacumine.
Qui cum ingruentem e more praecineret diem
Ex proximo spe praedae adest Vulpis cavo,
Sacrumque Soli consalutat Alitem.
Rogare porro, copiam sui sibi
Faceret precanti. Cupere se miris modis
Os suaviari tam eruditum et candidum.
Pellacis ille sentiens hostis dolum,
Soror o faceta dixit, Hercules tecum
Futura suavis ista conversatio est.
Custode sed tenetur hoc limen, nisi
Aperiat ille non potero descendere.
Rata ergo id unum vota vulpis perfida
Morari; adire, et suscitare sedulo
Clamore custodem; Ille ut absterso feram
Sopore vidit, impetu facto ilico [(editor); sic: ilico]
Dilaniat hostem. Fraus suum auctorem petit.
Caspar von Barth (1587-1658). Fabularum Aesopiarum Libri III, published in 1612. Available online at the University of Mannheim. |
