<< Home Page | Odo Index

Aesop's Fables and Other Parables: Odo of Cheriton

62. DE RANA INFLATA.
Perry 376

Contra magna appetentes ex inuidia.
Rana uidit Bouem in prato incedentem. Cogitauit si posset esse ita magna (sic) ut Bos ille, et uocauit filios dicens: Ecce quanta decencia et magnificientia, si possem ad magnitudinem Bouis peruenire! Et intumuit et inflatus (sic) est quantum potuit. Et ait filiis suis: Adhuc ita magna sum ut ille Bos? Dixerunt filii: Nondum magna es ut caput Bouis. Est ita, dixit Rana; adhuc inflabor. Et in tantum intumuit quod medius (sic) crepuit.
Sic sunt plerique qui uident episcopos, abbates, archidiaconos, quasi boues cum magna pompa incedentes. Cogitant qualiter possent ita magni fieri, et in tantum conantur quod in anima uel corpore moriuntur.

62a. [DE FILIO MILITIS].
Perry

Vidi quendam qui habuit patrem optimum militem et uoluit ei assimulari (sic); cui ui[m] natura negauit, et in tantum tornatus est in torneamento, quod mortuus est. / Similiter layci uident alios laycos bene indutos, splendide comedere, magnos equos equitare, familiaritatem cum principibus habere; in tantum conantur eis equiparari quod moriuntur. Frater, si factus es talis bos magnus, lauda Dominum; si rana efficeris, id est pauper et modicus, esto contentus. Noli querere bos fieri. Disponat Dominus de sua republica secundum quod uoluerit: hunc humiliat et hunc exaltat. Ideo dicitur in Ecclesiastico (5.2): Non te extollas in cogitatione anime tue, ne forte elidatur uirtus tua per stulticiam.

The Latin text of Odo shown here is taken from Léopold Hervieux, Les fabulistes latins depuis le siècle d'Auguste jusqu'à la. fin du Moyen-Age (1893-1899). There is a delightful English translation of Odo by John Jacobs, which is still in print. It's a lovely book!