<< Home Page | Phryx Aesopus (Osius) Index

Phryx Aesopus (Osius, 1574)

179. LUSCINIA ET ACCIPITER. (Perry 4)

ACcipitrem supplex, ut se dimittat, Aedon
Capta tamen vanis vocibus orat avis.
Non hoc gratuito nobis facturus es, inquit,
Sed tali merito praemia digna feres.
Quae quaerente sibi speranda sit alite merces,
Huic ait, arguto carmine docta canam.
At nunc non aures, avidum sed pascere ventrem,
Nescia placari me iuvet, inquit avis.
Non capit indoctos ex artibus ulla voluptas,
Quae genio placeant, res modo vulgus amat.
Subicit hanc etiam doctrinam fabula nobis,
Non equidem fructu quam meminisse caret:
Haec quae vita geri manifesto flagitat usu,
Iucundis fuerint anteferenda bonis.