<< Home Page | Rom. Ang. Index

Aesop's Fables: Romulus Anglicus

121. de lupo et nauta (p. 640 in Hervieux; Perry).

Lupus, in aliam regionem transiturus, venit ad fluvium. Quod cum videret latum et altam, non audebat se undis committere; sed rogavit Nautam, ut ipsum in navicula sua transportaret. Faciam, inquit, si naulum dederis. Et ait Lupus : Dabo quod volueris; tantum me recipiat navis. Jussus [est] ergo intrare, et navis soluta est a littore. Tunc ait Lupus homini : Dic modo quid daturus sum tibi mercedis. Tria vera, inquit, michi dicas pro precio. Placuit hoc Lupo, et statim unum protulit dicens : Benefacit qui benefacit. Et ait Nauta : Satis verum est istud. Post hec, medio iam in flumine transito, protulit secundum, dicens : Qui sic non facit, peius facit. Et istud non minus verum est, ait Homo; et exegit tercium. Cui Lupus : Tercium non habeo pre manibus; sed, interim quod littore approximamus, inde cogitabo. Illis ergo prope littus factis, Lupus saltu se de nave extulit, et in sicco constitutus, ait : Quitquid boni fit perverso, perditum est ex integro.
Moralitas. Verum est Lupi proverbium, quia male expenditur quitquid malo impenditur.