<< Home Page | Walter Index

Aesop's Fables: Walter of England

Fable 23. De fure et cane.

Perry 403

Fure vocante canem pretenso munere panis,
Spreto pane, movet talia verba canis:
"Ut sileam tua dona volunt furtisque laborant
Esse locum; panem si fero, cuncta feres.
Fert munus mea damna tuum, latet hamus in esca:
Me privare cibo cogitat iste cibus.
Non amo nocturnum panem plus pane diurno,
Advena plus noto non placet hostis hero.
Non rapiet nox una mihi bona mille dierum:
Nolo semper egens esse semelque satur.
Latratu tua furta loquar, nisi sponte recedas."
Hic silet, ille manet; hic tonat, ille fugit.
Si tibi quid detur, cur detur respice; si des,
Cui des, ipse nota; teque, gulose, doma. 


Text as published in Boldrini, Sandro. Uomini e bestie: le favole dell Aesopus latinus. Lecce: Argo, 1994.