Aesop's Fables: Walter of England
Fable 52. De lupis et ovibus.
Perry 153
Pugna lupis opponit oves, oviumque satelles
Est canis, est vervex: hac ope fidit ovis.
Palma diu dormit, desperat turba luporum
Et, simulans fedus, federe temptat ovem.
Fedus utrumque fides iurato numine fulcit,
Id lupus, id simplex obside firmat ovis,
Datque lupis, male sana, canes, recipitque luporum
Pignora: nec metuit nec sua damna videt.
Cum natura iubet natos ululare lupinos,
Turba lupina furit, federa rupta querens.
Ergo pecus, tutoris egens, in viscera mergit:
Preside nuda suo sic tumulatur ovis.
Tutorem retinere suum tutissima res est:
Nam si tutor abest, hostis obesse potest.
Text
as published in Boldrini, Sandro. Uomini e bestie: le favole
dell Aesopus latinus. Lecce: Argo, 1994. |
