<< Home Page | Walter Index

Aesop's Fables: Walter of England

Fable 54. De cane et lupo.

Perry 346

Cum cane silva lupum sociat. Lupus inquit: "Amena
Pelle nites, in te copia sancta patet."
Pro verbis dat verba canis: "Me ditat erilis
Gratia, cum domino me cibat ipsa domus.
Nocte vigil fures latratum nuntio, tutam
Servo domum; mihi dat culmus in ede torum."
Hec movet ore lupus: "Cupio me vivere tecum:
Communem capiant otia nostra cibum."
Reddit verba canis: "Cupio te vivere mecum;
Una dabit nobis mensa manusque cibum."
Ille favet sequiturque canem gutturque caninum
Respicit et querit: "Cur cecidere pili?";
Inquit: "Ne valeam morsu peccare diurno,
Vincla diurna fero, nocte iubente vagor."
Reddit verba lupus: "Non est mihi copia tanti
Ut fieri servus ventris amore velim.
Ditior est liber mendicus divite servo:
Servus habet nec se nec sua, liber habet;
Libertas, predulce bonum, bona cetera condit:
Qua nisi conditur, nil sapit esca mihi.
Libertas animi cibus est et vera voluptas,
Qua qui dives erit, ditior esse nequit.
Nolo velle meum pro turpi vendere lucro;
Has qui vendit opes, hic agit ut sit inops."
Non bene pro toto libertas venditur auro:
Hoc celeste bonum preterit orbis opes.