Aesop's Fables: Walter of England
Fable 55. De ventre et membris.
Perry 130
Incusant avidi pes et manus otia ventris:
"Omnia solus habes lucra, labore cares.
Nos labor edomuit, te fovit inertia: sorbes
Omnia, que nostri cura laboris emit.
Disce pati famis acre iugum vel disce labori
Cedere, teque tui cura laboris alat."
Sic ventri servire negant; se venter inanem
Comperit, orat opem: nil dat avara manus.
Ille preces iterat: iterum fugit illa precantem.
In stomachi fundo torpet obitque calor;
Victa fame natura fugit, vis arida fauces
Obserat ut solitum non sinat ire cibum.
Vult epulas dare sera manus, sed corporis egri
Perdita non reparans machina tota perit.
Nemo sibi satis est: eget omnis amicus amico.
Si non vis alii parcere, parce tibi.
Text
as published in Boldrini, Sandro. Uomini e bestie: le favole
dell Aesopus latinus. Lecce: Argo, 1994. |