<< Home Page | Walter Index

Aesop's Fables: Walter of England

Fable 59. De iudeo et pincerna.

Perry

Fert iudeus opes, sed onus fert pectore maius:
Intus adurit eum cura laborque foris.
Ergo, metu damni, sibi munere regis amorem
Firmat, ut accepto preduce tutus eat.
Regius hunc pincerna regit, cor cuius adurit
Auri dira sitis, qui parat ense nefas.
Silva patet, subeunt. Iudeus in ore sequentis
Cor notat: "Ipse sequar," inquit; at ille negat
Et gladium nudans: "Nemo sciet," inquit "Obito."
Ille refert: "Scelus hoc ista loquetur avis."
Prosilit a dumo perdix: hanc indice signat.
Alter ait: "Scelus hoc ista loquetur avis?",
Et rapit ense caput et opes metit et scrobe funus
Celat. Agit celeres annus in orbe rotas.
Perdices domini cene pincerna ministrat,
Ridet et a risu vix vacat ille suo.
Rex audire sitit; hic differet dicere causam.
Fit locus, ambo sedent: hic petit, ille refert.
Rex dolet et leto mentitur gaudia vultu.
Regis concilium consiliumque sedet:
Pincernam crucis esse reum sententia prodit:
Crux punit meritum iure favente cruci.
Ut perimas quemquam nullum tibi suadeat aurum:
Nam decus et vitam mesta ruina rapit.