<< Home Page | Odo Index

Aesop's Fables and Other Parables: Odo of Cheriton

21. DE CASEO ET RATO ET CATO.
Perry 594

Contra prelatos aggrauantes inferiores.
Quidam habuit Caseum in archa, et uenit Ratus. Incepit eum rodere. Cogitauit paterfamilias quid faceret. Tandem habito consilio, posuit intus Murilegum, et ille deuorauit Ratum et Caseum.
Sic plerique episcopi ponunt aliquam parochiam in custodia capellani qui deuorat parochiam. Tandem ponit archidia[co]num qui deuorat parochiam et capellanum, hoc est caseum et ratum.

21a. DE CANIBUS ET CORNICIBUS.
Perry

Ita quando canes deuorant cadauer, Cornices super arbores expectant donec canes satiati recesserint. Tunc ueniunt cornices et ea que circa ossa remanent deuorant.
Certe ita quandoque contingit quod cardinales, legati, episcopi, archidiaconi deuorant capellanos et pauperes clericos. Postea ueniunt garciferi et nuncii, et deuorant si aliquid circa ossa sacerdotum remanet.

21b. DE MURE, RANA ET MILVO.
Perry 384

Contra stultos rectores.
Mus semel uoluit transire aquam et rogauit Ranam quod eam transmearet. Ait Rana: Liga te ad tibiam; sic dicam te ultra. Qui sic fecit. Et uenit Miluus et asportauit utrumque.
Hoc est quando parochia data est alicui stulto et insufficienti; uenit Diabolus et asportat utrumque capellanum et paroch[i]am.


The Latin text of Odo shown here is taken from Léopold Hervieux, Les fabulistes latins depuis le siècle d'Auguste jusqu'à la. fin du Moyen-Age (1893-1899). There is a delightful English translation of Odo by John Jacobs, which is still in print. It's a lovely book!