<< Home Page | Rom. Nil. Metricae Index

Aesop's Fables: Romuli Nilantis Fabulae Metricae

20. de fure et cane (p. 675 in Hervieux; Perry 403)

Fallenti nullus credat per reddita dona.
Fur quidam, pergens per tegmina noctis opace,
Ad tacitam, furtim causa, tunc diuitis aulam,
Panem quem secum portabat, fraude moloso
Porrigerat seruanti tunc dominumque domumque,
Cum somnus tenuit mortales corpore cunctos.
Cui canis horrisonis dicens est ore lecutus :
Tune tuum gratis panem mihi porrigis, anque
Vt dominum prodam tibi nunc caulamque fidelem?
Incius unde uicem uideor tibi reddere possim
Istius panis siccis in faucibus apti.
Nescio, si nunc largenti tibi fecero, numquid
In panem reddes alio mihi tempore largus,
Cum fame pestifera fuero ac tunc morte redactus.
Autumo non bene post mihi semper credere possis,
Sique meum prodam dominum tibi iure uetustum,
Hactenus egregio qui me de pane nutriuit.
[Q]uapropterque, meas ut fauces pane nociuo
Claudes, uel uetitum pastum nunc tangere nolo,
Vt lingua dominum prodam uel faucibus absit.
Te tenebris furem, nunc clamans, ergo latrabo,
Atque meum dominum famulosque quiete sepultos,
Horrisono multum iam latrans ore, sciebo,
Nocturnum signans furem illis te atque latronem;
Vtile namque bonum presens nunc cernere nolo;
Talibus in causis mallim iam sedque futurum.
Alligeris igitur perges aut gressibus istinc,
Autque reum furti signem te rictibus isthic,
Truncatusque mei fueris domini ense cruento.
Insontes caueant, situsque seductor adinfert,
Illius accepto paruo, ne grandia perdant.


The Latin text shown here is taken from Léopold Hervieux, Les fabulistes latins depuis le siècle d'Auguste jusqu'à la. fin du Moyen-Age (1893-1899). Volume 2.: Phèdre et ses anciens imitateurs directs et indirects, pp. 654-712.