Aesop's Fables: Walter of England
Fable 17. De asino et catulo et domino.
Perry 091
Murmuris et caude studio testatur amorem,
Nunc lingua catulus, nunc pede palpat erum.
Gaudet erus comitque canem comitemque ciborum
Efficit; alludit turba ministra cani.
Arte pari simileque cibos similemque favorem
Lucrari cupiens inquit asellus iners:
Me catulo prefert vite nitor, utile tergum,
Nec placeo fructu, sed placet ille ioco.
Ludam: lude places." Sic ludit tempore viso,
Ut ludo placeat, ludit et instat ero.
Blandiri putat ore tonans, umerisque priorum
Pressis mole pedum se putat esse pium.
Clamat erus, vult clamor opem; subit ordo clientum.
Multa domat multo verbere clava reum.
Quod natura negat, nemo feliciter audet:
Displicet inprudens unde placere putat.
Text
as published in Boldrini, Sandro. Uomini e bestie: le favole
dell Aesopus latinus. Lecce: Argo, 1994. |
